كاطو بلاموس ديال الشكلاط و كريما القهوة

هاد الكاطو تيجي راقي او تيصلاح لعيد الميلاد و حتي في المناسبات

نحتاجو ل 2 جنواز ، انا كل وحدة درت فيها

    4 بيضات

120غ فورص 

    120غ سنيدة 

    + نصف خمارة 

    + شوية الملح 

    + ملعقة كبيرة كاكاو

 

نطرب سنيدة مع البيض و شوية الملح مزيان

ثم نحبس الباطور و نزيد فورص و ½ خمارة و معلقة الكاكاو مغربلين شوية بشوية مع التحراك من الأسفل الى الاعلى

بمعلقة الخشب

.

ثم ندير الخليط في مول مدهون و مفرش بورق السيلفريزي و ندخلوها للفرن لمدة 10 دقايق

ملي طابت نديروها في المول اللي غندير فيه المونطاج تم نسقيها بالسيرو سنيدة + الماء.

 

نحضر لاموس ديال الشكلاط:

150غ سنيدة + 4 معالق كبار الماء

5 اصفر البيض

250غ شكلاط أسود

450غ الكريم فريش

كناخد سنيدة + الماء تندير الكل فوق البوطة يبدا يعقاد شوية نطفيو عليه و هاكا كنحصل على السيرو

 

تناخد 5 اصفر البيض نطربوهم مزيان بالباطور و في نفس الوقت تنزيد عليهم السيرو باش نعقم البيض

نبقاو بالباطور حتى يرجع الخليط أبيض

 

كناخد الشكلاط يدوب في حمام ماري و نزيدوه على البيض

نطرب الكريم فريش بلا سكر حتى تولي شانتيي و نزيدوها على الخليط

من بعد ندير لاموس فوق الجنواز الأولى و ندخلوها للمجمد لمدة 2 أو 3 ساعات

عاد نحط الجنواز اللي بقات و نسقيوها بالسيرو و نرجعوها للمجمد

 

ندوزو للطبقة التانية ديال الكريمة القهوة:

250غ سنيدة

كاس العنبة فيه الماء+ 2معالق صغار نسكافه

3 بيضات مخلطين

350غ كريم فريش مطلعة بالباطور بدون سكر

4 أوراق الجيلاتين

 

تندير السنيدة تحرق بلا ما نحركوها بحتى شي حاجة ( الى حركناها كتخسر) نخليوها حتى تدوب تماما

نحيدوها من فوق البوطة, و نزيد عليها مباشرة داك كاس القهوة شوية بشوية مع التحراك السريع (نبعد الوجه حيت كاينة الكشكوشة

 

من بعد نردوها تاني فوق البوطة واحد 10 دقايق مع التحراك.

نزول الكاسرونة من فوق البوطة و نضيف مباشرة البيض مع التحراك السريع

تم نرجع الخليط مرة أخرى فوق

نار مهيلة حتى يعقاد

.

ملي يعقاد, نطفي البوطة و نضيف الجيلاتين اللي رطبنا في الماء و عصرناها و حركنا الكل حتى يتنساجم

و صفيناه و نخليه يبرد شوية

.

كنضيف الكريم الفريش مطلعة شانتيي بالباطور بدون سكر و نخلط مزيان

نخرج الكاطو من المجمد و نغطيه بالكريما و نرجعوها تاني للمجمد

نحضر الكلاصاج

:

150غ شكلاط أسود ممتاز (60%  كاكاو )

100غ  شكلاط أسود عادي

2 أوراق الجيلاتين

 كاس ااحليب (ديال العنبة)

1معلقة كبيرة الكليكوز

 

تندير جميع العناصر من غير الجيلاتين فوق عافية مهيلة حتى ينساجم و نطفيو عليه

تم نزيد الجيلاتين نخلطوه و نصفيه

تم نخويه على الكاطو تم نرجع تاني للمجمد

.

اخر مرحلة هي التزيين اللي طبعا تيبقا ليكم الاختيار ، كل وحدة وذوقها

 

هاد الكاطو تيبغي شوية ديال الدقة او شوية دالخاطر، لكن صدقوني تيجي راقي فالمداق